Die Fonteine, tuiste van die Somerbosch-wyne, is ontspanne en intiem – presies wat mens verwag van ’n werkende plaas wat vir langer as ’n halfeeu reeds in die Roux-familie se hande is.
Die plaas lê in die Helderberg-omgewing van die Stellenbosch-streek. Die koel Atlantiese seebries werk met die ander terroir-elemente van die plaas saam om die komplekse aard van die Somerbosch-wyne te ontwikkel.
Die premiumgehalte-etiket Somerbosch en ons Poker Hill-intreevlaketiket het sedert 1995 sinoniem geword met fynproewerswyn uit dié streek. Ons reeks wyne is innoverend en uiteenlopend, en is gewild onder ’n verskeidenheid van palette. Dit is in groot aanvraag sowel plaaslik as in verskeie Europese lande.
Met elke oesjaar streef ons daarna om met keurdruiwe van ons eie spesifieke wingerde en met spesiale sorg en aandag ’n wyn te skep wat Somerbosch Kylix waardig is – ons landgoedversnitetiket. Dié word in beperkte hoeveelhede beskikbaar gestel en in oesjare wat deur die natuur bepaal word, en dis gemik op die connoisseur en ernstige wynfynproewer.
