By Marianne het ons die voorreg om twee moderne boetiekwynmakerye te hê. Elkeen is toegerus om uitstekende, handgemaakte wyne te produseer. Met ons Franse erfenis en internasionale savoir-faire streef ons daarna om wyne met ’n Franse styl te maak, maar met ’n tikkie Suid-Afrikaanse atmosfeer.
Ons glo in natuurlike wynmakery met die minimum ingryping, in die vaste oortuiging dat die geheim van ’n uitstekende wyn in die wingerd is, en in die pragtige landskap waardeur dit omring word.
Die Marianne-landgoed, wat in 2004 gevestig is, is ’n boetiekwynlandgoed van 36 hektaar geleë op die voorheuwels van die Simonsberg. Die landgoed spog met 17 hektaar wingerd, ’n proevertrek en kelders, weelderige akkommodasie en die Floréal Brasserie. ’n Wynmaaktradisie: Christian Dauriac, eienaar van die Marianne-landgoed, maak al langer as 30 jaar wyn in Bordeaux.
Hy besit tans drie chateaux in Bordeaux: Destieux (Grand Cru Classe of Saint Emilion), Montlisse (Grand Cru) en La Clemence (Pomerol). Christian bring gereeld spesialiste uit Frankryk om hul wynmaak- en wingerdboukundigheid te deel. Terroir, klimaat, grond, hoogte en hellingoriëntasie is noodsaaklike elemente om soveel variëteitseienskappe as moontlik vas te vang.
Die klimaat is matig tot warm met suidewinde, wat verseker dat die druiwe verkoel word tot die optimum temperatuur vir maksimum karakter en geur. Die grond het hoofsaaklik ‘n medium tekstuur en die feit dat hier ’n gemiddelde jaarlikse reënval van 800 mm is, verseker minimale behoefte aan watervoorsiening.
