La Boucher Wines is ’n familiewynmakery wat deur die Boucher- en die Els-familie bestuur word. Wyn en familie is ons lewe. Daar is geen plek op aarde soos in die wingerde nie, betowerend en vol lewe.
Ons druiwe kom uit die Stellenbosch-streek. Die koeler klimaat danksy die seebries en ou granietgrond maak die produksie van wyn van topgehalte moontlik.
Die naam La Boucher kom uit die tyd toe die eerste Hugenote na die Kaap die Goeie Hoop gekom het. Boucher is ’n van wat gedurende die Middeleeue in die Franse streek Champagne ontstaan het. Dit was ’n beroepsnaam vir iemand wat as ’n slagter gewerk het. Die naam kom oorspronklik uit die Oud-Franse woord “bochier”, wat “slagter” beteken. Die eerste Boucher-Hugenote het egter die naam La Boucher gebruik om hul identiteit te versluier toe hulle uit Frankryk ontsnap het.
Die Boucher-familie is die sesde geslag boerefamilie, maar is nou net die eerste geslag wynmakers. Die eerste geslag was Pierré Boucher, ’n Franse skaapboer wat hom in die Kaapse wynland gevestig het, ’n klein stukkie wingerd vir ander wynmakers aangeplant het en verder met vee geboer het. Voordat die tweede geslag hierdie tradisie kon voortsit, het die familie noordwaarts beweeg. Dit was eers die sesde geslag wat in 2013 na die wynbedryf teruggekeer het. In 2018 het die Boucher- en Els-families saamgespan om hierdie pragtige deel van die geskiedenis te bewaar en hulle eie passie uit te leef.
Die wingerde groei op ou granietgrond teen die hange van die Bottelaryheuwel, met die Atlantiese Oseaan sigbaar en ’n perfekte kombinasie van alles wat nodig is om volronde, vrugtige wyne te skep.
