Erika strewe daarna om wyne te skep wat Suid-Afrika se unieke wingerdterreine en buitengewone diversiteit op vaardige wyse laat blyk – om ’n gevoel van herkoms vas te vang terwyl die intrinsieke aard van die vrug met respek weerspieël word.
Deur spesiale wingerdterreine dwarsoor die Wes-Kaapse wynland te selekteer en aan te skaf, en hulle met die geskikste variëteite saam te voeg, lewer sy wyne wat die heel beste van hierdie kenmerkende en uiteenlopende streke beliggaam.
Hierdie handversorgde reeks lewer terroirspesifieke wyne van beperkte hoeveelhede waar die benadering noukeurige aandag aan detail en die nastreef van die hoogste gehalte behels. Balans, lengte en konsentrasie staan voorop, en elke bottel is ’n reis na ’n plekgevoel en ’n viering van ’n oomblik in die ruimte van tyd.
Groenekloof is geleë naby Darling aan die Weskus en bestaan uit ’n reeks heuwels ewewydig met die oseaan. Hierdie gebied is besonder goed geskik vir die lewering van uitstaande Sauvignon Blanc. Dit het ’n maritieme klimaat en word baie beïnvloed deur die Atlantiese Oseaan net ’n paar kilometer verder na die weste.
Die streek het koel en mistige oggende gevolg deur hoër dagtemperature en koeler middagbriese wat verligting en lafenis vir die druiwe bring. Saam met gereelde seemis help dit om die rypwordseisoen langer te maak en om die druiwe se suurheid te behou terwyl komplekse vruggeure ontwikkel. Die sterker suidoostewind beperk die vegetatiewe groei van die wingerde en dit lei tot kleiner korrels met ’n dikker skil. Dit dra ook by tot kompleksiteit in die wyn wat daarvan gemaak word.
Danksy taamlik konstante weer, koue briese uit die Suid-Atlantiese Oseaan en koel heersende suidwestewinde is die druiwe in die Groenekloof-wyk seker van ’n lang rypwordtydperk vir maksimum aroma-ontwikkeling. Die diep, rooi, ontbinde graniet het ’n goeie waterhouvermoë, wat geskik is vir droëlandbewerking. Die Groenekloof-wingerde is net 8 km van die koue Atlantiese Oseaan en lê tot 350 meter bo seevlak.
