De Grendel Shiraz 2018

Druiwe van die hoogste gehalte is uit geselekteerde wingerde in die omgewing van die Paarl en Firgrove verkry, wat tot die unieke eienskappe van die wyn bydra. Hierdie wingerde gedy in ’n kombinasie van lateriet en grond met geel klei-onderlae.

Helderpers van kleur met ’n diep violet rand. Die neus lei tot vooraf-aromas van parfuum, viooltjies, glansjambon, peper en boegoe. Die wyn bied ’n gladde ingang op die verhemelte, met sagte, naatlose lae van naeltjies, neutmuskaat en warm speserye, gesteun deur ’n souterige en vleisagtige nasmaak.

Die De Grendel Shiraz sal besonder goed pas by varkneksteak voorgesit met ’n bosbessie-afkooksel, ’n tradisionele glansjambon gedurende die feestyd en veral met wildsvleissnitte in die kouer wintermaande.

Geniet die Shiraz nou of laat dit vir nog vyf tot agt jaar verouder.